CEBU, Philippines - Patay ang usa ka hubog nga panday human kini gipusil sa mga lalaki nga nagtinabangay og kulata kaniya diha sa eskina sa N. Bacalso Avenue ug Tabada St. sa barangay Mambaling, Cebu City kagahapon sa kaadlawon.
Ang biktima naila nga si Emmanuel Gasco Jr., 36, lumad sa barangay Panubigan sa lungsod sa Pito sa Zamboanga del Sur.
Matud pa nga misulod sa usa ka videokihan sa maong dapit ang biktima apan duna kini nakaaway sa sud ug nagkasinumbagay diha sa gawas.
Ang lalaki nakapunit og bato ug gihapsan ang ulo niini ug gibiyaan apan mibalik kini nga may dalang kauban nga nagdala og samurai ug gitabangan nila og kulata si Gasco.
Tunga-tunga sa pagpangulata, usa kanila ang mipusil kang Gasco sa tuong aping ug dughan nga maoy nakaingon sa iyang hinanaling kamatayon. Ang kapolisan padayon pang nangita sa mga killers. (BANAT NEWS)