CEBU, Philippines - Walay himuong Christmas party karong tuiga ang Police Regional Office 7 sumala pa ni Chief Supt. Danilo Constantino agi og pakigduyog sa mga nabiktima sa duha ka nagsunod nga katalagman sa Kabisay-an.
Ang Kabisay-an una nga gitay-og og 7.2 magnitude nga linog niadtong Oktubre 15 nga mibiktima sa liboan ka mga tawo gani wala pa kompleto nga makabangon ang Bohol tungod niini.
Misunod sab ang bagyong Yolanda nga miigo sa Central Visayas lakip na ang amihanang Sugbo nga mikalas sa dul-an sa usa ka gatos ka mga tawo ug miguba sa mga kabtangan, balay ug panginabuhian sa mga liboan ka mga tawo.
Si Supt. Pablo Labra III ang hepe sa Regional Intelligence nagkanayon nga ang tanang mga estasyonan sa tibuok rehiyon dili magpahigayon og Christmas party.
Apan ang hepe sa Cebu City Police Office, Sr. Supt. Noli Romana miingon nga magpahigayon ang CCPO og party.
Giklaro ni Romana nga dili pwede nga walay party ang CCPO apan himuon nila kining simple isip paghinumdom nga kita mga Kristiyano. Hinuon tumong usab sa maong Christmas party mao ang fund-raising drive aron makatigom og kwarta nga ilang ihatag sa mga biktima sa katalagman. (BANAT NEWS)