12 ka generator sets gipadala sa DOE sa Northern Cebu

CEBU, Philippines - Gihatud na sa Department of Energy-7 ang 12 ka mga generator sets ngadto sa Cebu provincial government aron ipang apod apod sa mga isla nga naigo sa bagyong Yolanda.

Matud pa ni Antonio Labios, ang regional director sa DOE-7 nga adunay 164 ka mga gensets nga gipanghatag sa DOE sa mga lugar nga naigo sa maong bagyo.

Dinhi sa Cebu, matud pa ni Labios nga walo niini adto ibutang sa Bantayan Island. Ang maong isla gilangkuban kini og tulo ka munisipyo Bantayan, Sta. Fe ug Madridejos.

Samtang ang upat ka gensets adto ibutang sa Camotes Island. Ang maong isla gilangkuban kini sa upat ka munisipyo, Poro, San Francisco, Tudela ug Pilar.  Ang mga generators gipadala aron dunay temporaryong suplay sa kuryente ang maong mga lungsod aron maka-function ang ilang mga local nga kagamhanan.

Bag-ohay pa lang nabalik ang linya sa kuryente sa tanang major o backbone lines sa tanang lungsod sa amihanang Sugbo ilabi na ang siyudad sa Bogo ug Danao. (Mitchelle Palaubsanon/EIM)

Gidaubang duha ka tawo sud sa SUV gidudahang Korean gyud

Pangunayan mismo sa Provincial Director sa Cebu City Police Office Supt. Noel Gillamac ang Special Investigation Task Force alang sa pagpalawom sa imbistigasyon sa kamatayon sa usa ka lalaki ug babaye nga gidauban sa dakbayan sa Danao sa miaging semana. Matud ni Gillamac nga nakig-alayon na sila sa Highway Patrol Group 7, PNP Crime Laboratory 7, ug sa Criminal Investigation and Detection Group 7 aron sila motabang sa imbestigasyon sa maong kaso.Giplanohan nga ipa-DNA test ang mga lawas.

Nakig-alayon usab sila sa buhatan sa Korean Consul tungod sa pagduda nga ang gisunog nga babaye ug lalaki posible nga mga Korean nationals.

Gibutyag ni Gillamac nga nabalaka ang Korean Community dinhi sa Sugbo tungod kay dunay duha ka mga Koreans nga gikatahong missing sukad pa niadtong Nobiyembre 17. (BANAT NEWS)