CEBU, Philippines - Patay ang usa ka 64 anyos nga lalaki human malimbuwad ang giluwanan niini nga motorsiklo sa dalan national highway sa barangay Poblacion sa lungsod sa Sogod alas 3:00 pasado ang takna sa hapon niadtong miaging Domingo.
Ang traffic section sa kapolisan sa maong dakbayan miila sa biktima nga mao si Jesus Mendoza Tan, minyo nga taga dalan S. Sanchez sa barangay Ibabao sa dakbayan sa Mandaue.
Sa taho sa kapolisan sa maong lungsod nahibaw-an nga gikan pa sa dakbayan sa Bogo ang biktima nga nagsakay sa Honda Wave 125 nga motorsiklo ug nagpaingon na sa dakbayan sa Mandaue.
Dugang pa sa kapolisan nga nagdagan subay sa nahisgotang dalan ang motorsiklo nga giluwanan sa biktima apan dihang nahidangat kini sa barangay Poblacion kalit lang nadasmagan ang iro nga milabang sa dalan nga maoy nakaingon sa pagkalimbuwad sa sakyanan niini.
Ang biktima nga nagsul-ob og close type helmet nabundak sa iyang pagtugpa sa sementadong karsada nga maoy nakaingon sa nasinati nga grabeng kadaut sa iyang kalawasan.
Dali kining gihatod sa mga residente sa maong lugar ngadto sa Don Juan Dosado Hospital sa nahisgotang lungsod apan gideklarar kini sa mga doktor nga dead on arrival. (BANAT NEWS)