Evacuation centers sa Lapu’City mopasalida sa Pacquiao-Rios fight karong adlawa

CEBU, Philippines - Butangan og mga dagkong TV screen ang upat ka evacuation centers sa dakbayan sa Lapulapu atol sa away ni Manny "Pacman" Pacquiao ug Brandon Rios karong adlawa.

 Matud pa ni Lapulapu City Mayor Paz Radaza usa kini sa pamaagi aron maibanan og mahupay ang kagul-anan sa mga evacuees sa bagyong Yolanda mao ang paghatag og higayon nga ilang makita pag-usab ang “Pambansang Kamao” nga moaway didto sa Macao.

Ang gipabutangan og mga tv screens mao ang evacuation centers sa Brgy. Looc, Brgy. Gun-ob, Brgy. Babag ug Subabasbas aron masaksihan sa nahibiling 700 ka mga evacuees ang away ni Pacman ug Rios. Ang sangka ni Pacman gituohang makapawagtang sa stress sa mga biktima sa kalamidad sa bagyong Yolanda.

Una nang namahayag si Pacman nga ang maong away iyang idalit alang kini sa mga biktima sa kalamidad sa nasud human sa gubat sa Zamboanga, linog sa Bohol ug ang trahedya nga mikalas ug daghang kinabuhi ang bagyong Yolanda.

Gikalipay sa mga evacuees ang paghatag og higayon sa lokal nga kagamhanan sa dakbayan sa Lapulapu nga ilang masaksihan ang away ni Pacquiao live sa matag evacuation centers sa dakbayan sa Lapu-Lapu.  (BANAT NEWS)