Bag-ong BOC Cebu collector way dad- ong sakop

CEBU, Philippines - Way planong magdala og kaugalingong tawo ang bag-ong Cebu Customs District Collector Retired Brig. Gen. Roberto Almadin sa pagdumala sa aduana sa Sugbu.

Matud pa ni BOC Commissioner Rozzano Rufino "Ruffy" Biazon dunay mga tawo nga ilang gibansaybansay sa mga pamaagi sa operasyon sa Bureau of Customs ug kini alang sa mga posisyon nga nabakante sa aduana lukop nasud.

Gihatagan ni Biazon og katungod si Almadin sa pagpili sa iyang mga sakop nga maglangkob sa mga nabakanteng posisyon sa Customs Port of Cebu.

Apan si Almadin mipadayag nga dili na kinahanglan nga modala pa siya og mga tawo gumikan kay siya usa ka lumad nga Sugbuanon ug dako ang iyang pagsalig sa mga opisyal nga kasamtangang nagdumala sa Port of Cebu.

Hinoon iya pang sutaon kung kinsa ang iyang ibutang isip Deputy Collector for Assessment, Deputy Collector for Operations ug hepe sa Assessment division nga bakante hangtod ning panahona.

Matud pa ni Almadin iyang paninguhaon nga iyang matuman ang tulo ka importanteng tahas kaniya sa Department of Finance .

Kini mao ang pagpukan sa illegal smuggling, pagkab-ot sa collection target ug paspas nga trade facilitations sa ilang mga kliyente.

Si Almadin lumad sa dakbayan sa Danao ug kanhi  Brig. General sa Philippine Air Force diin human sa iyang pagretiro karon gitudlo isip District Collector sa Port of Cebu.( /EIM)(BANAT NEWS)