CEBU, Philippines - Gamay na lang ug nahimo na lang nga 700 ka evacuees gikan sa Leyte ang nahibiin sa upat ka evacuation areas sa dakbayan sa Lapulapu nga giatiman sa mga sakop sa DSWD.
Matud pa ni Lapulapu City Police Office Director P/SSupt. Rey Lyndon Lawas base sa ilang ulahing talaan mikabat na sa 4 mil ka mga evacuees ang miabot sa NAVFORCEN ug 3 mil na ka evacuees ang miagi sa PAF Base.
Nasayran nga ang uban kanila gikuha na sa ilang mga paryente ug ang uban nakakita na og temporaryong kapuy-an dinhi sa Sugbu.
Padayon ang ilang paghatag ug hugot nga seguridad sa 700 ka mga evacuees nga anaa nagpabilin sa mga evacuation areas sa Brgy. Looc, Brgy. Gun-ob, Brgy. Babag ug Brgy. Subabasbas sa dakbayan sa Lapulapu.
Lakip sa ilang gimonitor mao ang taho nga dunay mga tawo nga moduol sa mga evacuees ug mitanyag og trabaho dinhi sa Sugbu.
Matud pa ni SSupt. Lawas ang PNP, DSWD ug ang mga opisyal sa barangay maoy nagtambayayong sa pagsumpo niining maong matang sa recruitment sa mga evacuees aron dili kini mabiktima sa eksploytasyon ilabi na ang mga kababaenhan.
Gumikan niini dili na bastabastang makasud sa evacuation centers kung wala kini importanteng tuyo o kabanay sa mga evacuees aron malikayan sa mga dautang tinguha sa mga illegal recruiters. (/EIM)(BANAT NEWS)