CEBU, Philippines - Gusto ni Mayor Michael Rama nga ang dakbayan sa Sugbo mo-adopt og usa ka lungsod sa lalawigan sa Leyte aron mao kini pokusan sa mga hinabang sa tumong nga makabarog kini pagbalik gikan sa grabeng nahiaguman niini sa bagyo.
Matud ni Rama nga naglaum siya nga kini usab unta maoy himoon sa ubang local government units (LGU) nga mosagop sila og mga lungsod sa Leyte nga hatagan nila sa ilang tabang.
Gipasabot ni Rama nga ang paghatag og hinabang sama sa pagkaon di paigo. Giangkon hinoon sa mayor nga ang iyang nahuna-hunaan magkinahanglan nga aprobahan kini sa konseho sa dakbayan sa Sugbo.
Ang kwarta nga gamiton paggasto niini mahimong adto kuhaon sa Calamity Budget sa dakbayan nga katumbas sa singko porsiyento sa iyang koleksyon.
Ang mayor namahayag nga kun siya ang pagbut-on ang dakbayan sa Sugbo dili angay’ng mapul-an sa pag-atiman sa mga bakwit nga nabiktima sa katalagman ug ania karon midangop sa Sugbo.
Si Rama nga personal nga nakabisita sa mga dapit sa Tacloban ug ubang bahin sa Leyte nakapanglingo-lingo kay matud niya grabe kaayo ang nahiaguman nga kadaut sa ilang panimalay ug kabtangan.
Gani sa pagbana-bana ni Rama nga dugay pa kaayo makabarug pagbalik ang Tacloban human nga gibanlas ang kabalayan sa tubig-dagat nga misuyla ngadto sa tibook dakbayan atul sa bagyo nga Yolanda. (BANAT NEWS)