CEBU, Philippines - Usa ka panimalay ang gilungkab sa wala pa mailang mga kawatan diha sa Corazon Village, Brgy San Isidro, Talisay City kagabii.
Igo nalang sa pagdangop sa kapolisan ang biktimang si Annette Navarro, 44 , residente sa maong dapit human niya madiskubrehing gilungkab na ang iyang balay.
Sa gihimong ocular inspection ni Police Senior Inspector Al Pascual nasuta nga ang balay gisud sa kawatan pinaagi sa pagguba sa window grill sa kasilyas niini.
Nakuha gikan sa balay ang cash nga P7,500; mga bulawang alahas, mga power tools ug uban pa nga mokabat tanan og P122,500.
Ang kapolisan padayon pa karon sa ilang imbestigasyon pag-ila sa mga mihimo sa maong krimen. (BANAT NEWS)