CEBU, Philippines - Mopasaka gyud og kaso ang usa ka Korean national nga naigo sa palabad sa pumpboat sa kadagatan sa Brgy. Punta Engaño sa dakbayan sa Lapu-Lapu sa milabay’ng adlaw.
Ang biktima mao si Kim Jong Su, 23, kasamtangang nagpuyo sa 1st. Avenue Hotel sa Brgy. Pusok dakbayan sa Lapu-Lapu.
Sa pasiunang imbestigasyon ni PO3 Lydo Pinos nasayran nga mga 12:00 sa milabay’ng udto samtang nagpahigayon og scuba diving si Kim uban sa iyang mga higala, pagsaka niini sa ibabaw naigo kini sa palabad sa pumpboat nga iya sa Fun and Dive shop nga gipanag-iya ni Jennifer Gerasmio Apostol, 27, ulitawo, lumad sa Bien Unido Bohol ug kasamtangan nagpuyo sa Sitio Bout, Brgy. Punta Engaño.
Gumikan niini nahiagum og samad sa ulo ug dalonggan si Kim diin gidali kini pagdala sa tambalanan ug anaa na karon sa luwas nga kondisyon. (BANAT NEWS)