Balik na ang klase sa amihanan

CEBU, Philippines - Mobalik na karong  adlawa  ang klase sa  mga tulunghaan  sa  amihanang bahin sa lalawigan ug  sa mga isla  sa Camotes  nga  gigusbat  sa bagyong Yolanda.

Kini ang gipadayag ni Regional  Director Carmelita  Dulangon sa Department of Education (DepEd) kagahapon kinsa miingon nga ilang gipaningkamutan nga makapadayon sa ilang klase ang mga tulunghaan sa maong mga lugar bisan sa nasinating kadaut sa ilang mga tulunghaan.

Matud pa ni  Dulangon nga  nangayo  sila og  panabang sa laing mga dakbayan nga wala kaayo makasinati og dakong kadaut sa  bagyo niadtong Nobiyembre 8 niining tuiga.

Ang  mitabang  mao  ang dakbayan sa Lapulapu ug dakbayan sa Talisay nga mipadala   sa  ilang kaugalingong mga panday alang sa pag-ayo sa mga nadaut nga lawak saringan sa mga tulunghaan sa amihanan.

Si Dr. Dulangon miingon nga karong  adlawa iyang  gimando  sa mga  magtutudlo  nga ipahigayon  una  ang stress debriefing aron maulian kadtong  anaa  pa  sa kaugtas ug  kahadlok  sa nasinatian  nilang  peligro  atol  sa bagyo.

Dugang pa niya nga ilang dalitan og pagkaon ang mga bata sa matag tulunghaan sama  sa linugaw   nga may sustansiya  aron  sa pagpahiuli sa ilang kalagsik human sa nasinati nga katalagman.

Nasayran  nga  gisuspenso  ang  klase  sa mga  lungsod  nga  gikuso-kuso  sa bagyong Yolanda  sama sa mga  lungsod  sa Sogod,  Borbon, Tabogon, Medellin, San Remegio, Daanbantayan, Madridejos, Sta. Fe, Bantayan, San Francisco, Tudela, Poro, Pilar  ug  dakbayan  sa Bogo. (BANAT NEWS)