41 ka Korean disaster relief team miabot

CEBU, Philippines - Mikabat  sa 41 ka mga Korean Disaster Relief Team ug tulo ka abyon nga puno sa mga relief goods miabot sa tugpahanan sa Mactan Benito Ebuen Air Base kagahapon sa buntag.

Matud pa ni Korean Consul Chin Hyun Yung sa pakighinabi sa Banat News nga dala nila ang $5 million   nga balor sa  mga  relief goods  alang  sa  mga  nabiktima  sa bagyong  Yolanda. Kauban  sa  ilang  biyahe  ang usa  ka team sa Disaster Relief aron makatabang sa himoong clearing operation didto sa Leyte.

Napugos sila sa pagtugpa sa dakbayan sa Lapulapu   kay wala  may  nakaatiman  kanila nga  mga tinugyanan  sa  tugpahanan sa dakbayan  sa  Tacloban.

Kini  gumikan  sa kahuot  sa  ilang  tugpahanan  didto   sa kadaghang abyon  nga  gikan sa laing   mga  nasud.

Gumikan niini gipabalhin sila og laing tugpahanan aron mahatod ang ilang mga hinabang luwan sa tulo ka abyon nga dala niini alang sa kagamhanan  sa Pilipinas.

Ang Disaster Relief team sa mga Koreano naglangkob  sa mga nurse ug doctor ug mga eksperto sa rescue and retrieval operations.

Matud pa ni Chin   nga ila kining gihimo kay higala sa mga Koryano ang mga Filipino  ug  suod  kaayo  ang  mga  relasyon  niini.

Hinoon   wala  pa makompirmar ni Chin kung pila ka mga Korean nationals nga naapektohan atol sa trahedya didto sa dakbayan sa Tacloban   gumikan  sa  bagyong Yolanda.

Midugang  siya nga  nasayran  nila  nga  may  mga  Koryano  nga  nahilakip  sa maong  trahedya  didto  sa Tacloban  hinungdan  nga  milihok  sila  alang  sa  pagtunol  sa ilang  hinabang. (/WC)(BANAT NEWS)