CEBU, Philippines - Gikan sa engrande nga Christmas Party sa miaging mga katuigan, ang Bureau of Customs sa Cebu mikanselar sa ilang Christmas Party nga gitakda sa bulan sa Disiyembre.
Kini tungod sa bagyong Yolanda nga miigo sa Kabisay-an ilabina sa Leyte nga nagdala og grabing kadaut sa katawhan ug sa mga kabtangan.
Si Cebu Customs Port of Cebu District Collector Atty. Paul Alcazaren miingon nga ilang gikanselar ang ilang bongga kaayo nga Christmas party sanglit salikwaot kaayo sa usa ka government agency sama sa Bureau of Customs nga maglipaylipay karong panahona.
Kini taliwala sa daghang mga tawo nga anaa sa tumang kaguol ug kagutom human mabiktima sa bagyong Yolanda.
Iyang gipahibawo nga ang ilang buhatan nagtampo-tampo usab og mga hinabang ug ila na kining gihatud ngadto sa mga nabiktima sa bagyo ilabina didto sa syudad sa Tacloban.
Dugang pa niya nga inay party ang ilang himuon unya sa Disiyembre, usa ka santos nga misa na lamang ang ilang pagahimuon agi og pasalamat sa grasya gikan sa Kahitas-an.( /WC)(BANAT NEWS)