28 ka kapitan sa Lapulapu mihurar
CEBU, Philippines - Mihurar na ang 28 ka mga bag-ong napiling barangay kapitan sa dakbayan sa Lapulapu ngadto ni Lapulapu City Mayor Paz Radaza atol sa Association of Barangay Captains night sa milabay’ng gabii. Duha sa 30 ka mga barangay kapitan sa dakbayan ang wala makatambong sa maong kalihukan nga sila si Pajo Brgy. Captain Junard "Ahong" Chan ug Pusok Brgy. Captain Caridad Dawat.
Samtang si Kalawisan Brgy. Capt. Eduardo Vinse mitambong sa makadiyot apan gipapauli kini gumikan sa sakit sa kasingkasingi niini.
Atol sa maong okasyon si Radaza mipadayag ngadto sa mga kapitan nga kalimtan ang pamolitika ug ihatag sa ilang mga konstituwente ang serbisyo nga gipangayo niini.
Samtang si Chan nga nahinabi sa Banat News mipadayag nga wala siya makadawat og imbitasyon alang sa maong oathtaking.
Matud pa ni Chan iyang gisabot ang maong sitwasyon gumikan kay dili pa siya sakop sa ABC diin pormal kining moasumir sa iyang posisyon karong Disyembre 1.
Andam usab si Chan sa pagsuporta sa mga proyekto ni Mayor Paz Radaza nga makahatag og kaayohan sa iyang mga konstituwente sa iyang barangay. (BANAT NEWS)
- Latest
