3 ka rescue team gitukod sa Talisay police

CEBU, Philippines - Ang kapolisan sa dakbayan sa Talisay nagtukod og tulo ka grupo sa search and rescue team alang sa mga biktima sa bagyong Yolanda nga miigo sa Visayas kagahapon sa buntag.

Si Senior Inspector Al Pascual, deputy chief sa Talisay City Police Station nga nahinabi sa Banat News nagkanayon  nga gitukod nila  ang  maong  mga team niadto pang Huwebes sa pagpangandam sa pag-abot ni Yolanda.

Gibutyag ni Pascual nga nag-monitor sila sa kabarangayan sa siyudad ug nakig-alayon  usab sila sa City Disaster Risk Reduction and Management Council.

Matud ni Pascual nga niadtong Huwebes sa gabii adunay gipakatap nga mga polis  sa mga evacuation center aron motabang sa pagpahiluna sa mga mibakwit.

Kagahapon sa buntag si Superintendent Resty Santos uban sa iyang mga sakop misaka ngadto sa barangay Manipis aron sa pag-rescue sa mga residente sa  lugar kinsa mitago sulod sa imbornal tungod kay  nangaguba ang ilang mga balay.

Matud ni Pascual nga ilang  giipon  ang full force  sa kapolisan sa siyudad.

Apan bisan og bagyo wala gihapon pasagdi sa kapolisan ang ubang mga lugar sa siyudad  sa pangandam  batok  sa  mga  badlungon  samtang  may  nagsuroy-suroy  pa  sa  mga  kadalanan.

Gipasabot ni Pascual nga kasagaran sa mga tawo  namiya sa ilang kabalayan ug miadto sa mga evacuation center .

Busa  wala niya isalikway ang posibilidad nga molihok usab ang mga kiriwan.

Gawas niini padayon ang intelligence monitoring sa kapolisan ug nakigtambayayong sila sa kabarangayan.  (/WC) (BANAT NEWS)