CEBU, Philippines - Gialerto na sa Malacañang ang National Disaster Risk Reduction and Management Council (NDRRMC) kalabot sa nagsingabot nga bagyong ‘Yolanda’ sa nasud.
Sumala pa sa Philippine Information Agency sa Central Visayas (PIA-7) nga una nang gipahibalo sa PAGASA nga moigo ang giingong “super typhoon†sa dakung parte sa Visayas ug Luzon lakip na sa Manila karong adlawa.
Matud pa ni Presidential Communication Operations Office (PCOO) Secretary Sonny Coloma, partikular nga gipatutokan ni Presidente Benigno “Noynoy†Aquino III ang kaluwasan sa katawhan.
Dugang pa ni Coloma, nga naka-preposition na ang mga relief goods sa Department of Social Welfare and Development (DSWD).
Samtang giandam na usab sa mga sakop sa PDRRMC ang pundo sa gobiyerno aron mahatagan dayon og tabang ang mga maapektohan sa bagyo.
Samtang gipasaka na sa NDRRMC ang blue alert status sa tanang buhatan sa Office of Civil Defense (OCD) sa mga dapit sa nasud nga posibleng maigo sa bagyo.
Matud pa ni NDRRMC spokesperson Maj. Rey Balido, ang mga rehiyon nga gipaubos sa blue alert mao ang Northern Mindanao, Caraga, Regions 8, 7, 5, 4-A, 4-B ug Metro Manila.
Dugang pa ni Balido, nakaalerto na usab ang tanang mga disaster units sa Armed Forces of the Philippines (AFP). (BANAT NEWS)