CEBU, Philippines - Mipakita og maayong labok ang mga sakop sa Cebu City Traffic Operations Management (CITOM) sa buwan sa Septiyembre kay ang ilang koleksyon misubra og usa ka milyon ka pesos kun itandi sa miaging Agosto karong tuiga.
Mao kini ang gi-report ni CITOM Executive Officer Rafael Christopher Yap ngadto ni Mayor Michael Rama ug sa ubang mga opisyal sa kagamhanan sa dakbayan.
Ang koleksyon nila sa multa sa dinakpang drayber misaka gikan sa P911,495 sa buwan sa Agosto ngadto na sa P1,708,531 kon hapit moduble ang kantidad.
Ang kinatibuk-ang koleksyon sa CITOM sa buwan lang sa Septiyembre miabot og P6,051,856 nga labaw ug dul-an sa usa ka milyon ka pesos kun itandi sa P5,060,452 sa Agosto.
Hinoon ang labing dako nga koleksyon sa CITOM gikan g’yud sa bayad sa pag-parking sa mga sakyanan sa lainlaing “Pay parking area†daplin sa karsada nga kapin sa tulo ka milyon ka pesos.
Nasuta usab nga ang koleksyon sa CITOM sa buwan sa Septiyembre karong tuiga mas taas gihapon kay sa ilang koleksyon sa sama nga buwan sa miaging tuig.
Kini bisan og ang gidaghanon sa mga traffic enforcers naibanan dihang si Mayor Rama wala na moparenyu sa ubang mga enforcers nga gihulagway nga mga taspukan ug nalambigit sa mga binuang. (BANAT NEWS)