CEBU, Philippines - Usa ka autoshop ang gilabay og granada diha sa dalan Sacris sa barangay Bakilid, dakbayan sa Mandaue hinungdan sa pagkaguba sa lima ka mga mahalong sakyanan sa miaging kaadlawon.
Si PO2 Jessie James Galo sa kapolisan sa Presinto 2 sa Mandaue City Police Office (MCPO) nga nahinabi sa Banat News miingon ang Brabu Auto Shop nga gilabay og granada gipanag-iya ni Melencio Anuos Cacanog, 51, nagpuyo sa maong dapit.
Swerte nga ang caretaker nga si Ramil Mamac, wala maigo sa maong pagpamomba kinsa mitug-an nga nakit-an niya ang usa ka motorsiklo nga miagi ug dunay gilabay ang sakay niini nga mibuto sa ilang tindahan.
Ang nangaguba mao ang duha ka BMW, duha ka Mercedes Benz ug usa ka Ford Explorer.
Wala pa matino sa kapolisan ang motibo sa maong pagpamomba. (BANAT NEWS)