Karambola sa sakyanan, babaye nalabay patay

CEBU, Philippines - Usa ang patay ug duha ang angol human sila malabay sa motor nga ilang gisakyan nga nakabangga sa multicab nga ila untang gi-obertikan sa national highway sa barangay Lutac sa dakbayan sa Naga  pasado alas-12 sa udto sa miaging adlaw.

Ang nakalas naila nga si Elizabeth Gonzales, 55, taga barangay Kalunasan sa dakbayan sa Sugbo.

Samtang angol sab si Antonio Gonzales, 58, ug si Alex Mautos, 46, molupyo sa barangay Kalunasan sa dakbayan sa Sugbo.

Base sa imbestigasyon sa kapolisan nga si Elizabeth ug si Antonio luwan sa Honda nga motor nga may plate number 7BE 1091 nga gimaneho ni Mautos padulong sa dakbayan sa Sugbo.

Matud pa nga mi-overtake si Mautus sa usa ka Suzuki multicab nga may plate number JDY 760 nga gimaneho ni Romeo Dayaganon, 75, molupyo sa barangay Balirong sa dakbayan sa Naga.

Apan giingong nasaghiran ni Mautus ang walang bahin sa multicab hinungdan nga nisarasay ang motor sa pikas nga bahin sa lane ug natumba kilid sa dalan hinungdan nga nalabay ang duha ka mga sakay niini sa karsada.

Apan way swerte kay si Elizabeth nalabay sa karsada ug naligsan sa laing multicab nga may plate number GVZ 476 nga gimaneho ni Franco Adlawan nga molupyo sa barangay West Poblacion sa dakbayan sa Naga.

Sumala pa sa imbestigasyon nga kusog ang dagan sa multicab nga gimaneho ni Adlawan ug dihang nakita niya nga naa sa dalan si Elizabeth misuway unta siya og lihay apan wala na gyud madala.

Naigo sa ulo ang biktima ug nalubo ang ngipon niini tungod sa kakusog sa impact sa pagkaligis kaniya.

Daling gidala sa South General Hospital sila si Mautus, Antonio ug Elizabeth apan gideklarar nga dead on arrival si Elizabeth sa mga doktor samtang ang duha padayon pang gitambalan.  (/EIM) (BANAT NEWS)