Natagak sa tangke patay

CEBU, Philippines - Patay ang usa ka babaye nga Filipino-American nga natagak sa tangke sa tubig sa ilang panimalay sa barangay Saavedra sa lungsod sa Tabogon sa alas 11:00 sa miaging buntag.

Ang namatay naila nga si Marilyn Florida, 38, molupyo sa barangay Saavedra sa lungsod sa Tabogon, usa ka Filipino-American.

Base sa imbestigasyon ni SPO3 Brendo Joel Beriamente ug ni PO2 Manuelito Abrenica Jr. nga ang biktima motabang unta sa iyang bana nga si Sherril Jerome Florida, 61 anyos, American national nga nag-ayo sa tangke sa tubig.

Matud pa nga nadakin-as ang biktima sa tanke sa tubig ug natagak kini sa gitas-on nga walo ka tiil ug naigo ang iyang ulo sa armchair. Daling gidala ang biktima sa Badian District Hospital apan gideklarar na kini nga dead on arrival.

Si PO2 Romeo Legaspi nga nahinabi sa Banat News miingon nga ang biktima ug bana niini namalihog unta sa ilang silingan nga maoy moayo sa tangke sa tubig.

Apan wala na makapaabot ang biktima ug ang iyang bana ug gipangunayan na lang kini nila og ayo.

Matud pa ni Legaspi nga dangog ang tangke sanglit naa may mga lumot ug dunay tubig nga napundo sa tangke. Ang biktima daling gidala sa tambalanan.

Misubay si Legaspi nga mga maayong tawo ang managtiayon ug matud pa niini nga kugihan gyud ang biktima nga mao gyuy mangunay og limpyo sa iyang balay. Sumala pa ni Legaspi lima na ka tuig nga kasado ang duha. Girekomendar sa kapolisan nga ipa-awtopsiya ang lawas sa ginang.(/EIM) (BANAT NEWS)