BETs sa Pajo National High School gihulga sa mga ‘NPA’

CEBU, Philippines - Mga magtutudlo sa Pajo National High School nga nagsilbing sakop sa Board of Election Tellers (BET) nakadawat og suwat-hulga gikan sa nagpailang sakop sa New Peoples Army o NPA sa milabay’ng adlaw.

Apan sa imbestigasyon sa hepe sa Police Station 3 sa Mandaue City Police Office nga si Chief  Insp. Wilbert Parilla peke ang maong mga suwat tungod kay dili authentic nga logo sa walhong mga rebelde ang napatik nga letter heads sa suwat.

Nasayran nga niadtong Oktubre 25 sa hapon, nakadawat ang guwardiya sa Pajo Elementary School nga si Maximino Besin og karton nga dunay mga suwat alang sa tanang magtutudlo sa maong tunghaan nga apil sa piniliay sa barangay isip BET ug Board of Canvassers o BOC nga naghulga kanila.

Si March Mandal usa sa mga magtutudlo sa Pajo Elementary School nga nakadawat sa maong suwat miingon nga ang unod niini nagkanayon "kami panahon sa eleksiyon magbantay ug magtan-aw kami ninyo ang among gipangita mao ang limpiyo, patas, hapsay nga eleksiyon..kinahanglan nga ikaw anaa sa tunga...ayaw pakita’g bias arong walay gubot. Hinaut nga imong hatagan ug bili kay anaa ra kami sa palibot" gikan Ka Biting NPA.

Ang maong suwat nakapabalaka sa mga magtutudlo nga moserbisyo kagahapon maong midangop sila sa kapolisan. Apan sa pagsusi ni Chief Insp. Parilla sa dokumento peke kini ug hinimo-himo lang sa mga tawong way lingaw tungod kay dili kini mao ang logo sa NPA.

Bisan pa man niini, gidugangan sa LCPO ang mga polis nga gipakatap sa maong tunghaan. (/EIM) (BANAT NEWS)