CEBU, Philippines - Ang mga sakop sa Bantay Dagat Task Force dinhi sa dakbayan sa Sugbo hatagan og duha ka pump boat sa Bureau of Fisheries and Aquatic Resources (BFAR) aron nga magamit nila pagpatrolya sa kadagatan.
Ang City Legal Office mihatag na og rekomendasyon ngadto sa mga konsehal sa dakbayan nga hatagan og authority si Mayor Michael Rama nga makapirma sa Deed of Donation uban sa Regional Director sa BFAR nga si Andres Bojos.
Magpasabot kini nga kun madawat na sa Bantay Dagat sa dakbayan ang duha ka pumpboat nga ihatag sa BFAR, mahimo na nga tulo ang ilang motorboats nga magamit pagpatrolya sa kadagatan.
Ang Bantay Dagat nakaangkon usab og bag-ong speed boat nga kantidad og dul-an sa usa ka milyon ka pesos nga didto gikuha ang kwarta sa calamity budget sa dakbayan.
Ang pangulo sa Bantay Dagat Task Force nga si Ranulfo Sebusa kanunay lang miingon nga minus sila’g kalampusan ilabi na ang pagpangsakmit sa mga isda nga kuha sa illegal nga paagi, sama sa mga binuthan sa dinamita.
Laing tahas sa Bantay Dagat mao ang pagpatrolya sa kadagatan aron nga mabadlong ug madakop ang mga mangingisda nga mogamit og mga dinamita sa ilang pagpanagat. –/WC (BANAT NEWS)