Gastuhon alang sa anibersaryo sa kasal gitunol na lang alang sa biktima sa Bohol

CEBU, Philippines - Gikanselar ang gikatakda unta nga ika-50 ka tuig nga wedding anniversary sa uyoan ni Mandaue City Mayor Jonas Cortes nga si Engr. Zuelo Cortes ug sa iyang asawa nga gikatakda karong Oktubre 26 niining tuiga human makahukom nga ilang gastohon niini ila na lamang ihatag nga hinabang sa mga biktima sa 7.2 magnitude nga linog sa lalawigan sa Bohol.

Kini ang nasayran sa Banat News kang Engr. Jimmy Vasquez nga bayaw ni Engineer Cortes nga nahinabi kagahapon.

Matud pa niya nga napanglantawan ni Cortes ang mga biktima sa linog sa lalawigan sa Bohol nagkinahanglan kaayo og tabang sa katawhan karong panahona nga wala kaayo makasinati og kadaut sa maong katalagman nga miigo dinhi sa Kabisay-an.

Si  Vazquez miingon nga pasiuna nga gihatag nga hinabang ni Cortes ug sa iyang pamilya mao ang kinahon nga mineral water, mga canned goods ug uban pa.

Ang maong hinabang ilang gitunol ngadto sa drop-in center nga gipahiluna sa atubangan sa city hall nga gidumala usab sa buhatan sa social welfare services sa maong dakbayan.

Si Mae Aton sa SWS sa maong dakbayan nga nahinabi sa Banat News miingon nga gawas sa pamilya ni Engr. Cortes daghan pa gyud ang mihatag nga naglakip sa mga kawani sa kagamhanan sa maong buhatan.

Matud pa niya nga mga kinilo nga bugas, kinahon nga linatang sardinas, noodles ug uban pa ang gihatag sa mga kawani sa city hall ug daghan usab ang mga molupyo gikan sa nagkalainlaing lugar ang mihapit sa pagtunol sa ilang hinabang.

Si Roger Paller nga maoy tigpamaba sa kagamhanan sa maong dakbayan nga nahinabi sa Banat News miingon nga gipadala na nila kagahapon ang pasiuna nga hinabang ug sundan pa kini sa sunod semana sanglit nagpadayon man ang pagdawat sa gipahimutang nilang drop in center. (BANAT NEWS)