Duha patay dihang gidaro sa trak de karga
CEBU, Philippines - Duha ka tawo ang patay human nadasmagan sa nagsunod nga usa ka delivery truck ang usa ka motorsiklo diha sa gi-repair nga karsada sa national highway sa Barangay Uling, Naga City sa miaging hapon.
Ang mga nakalas giilang sila si Jhonnyuiel Peñarejo, 28, ug Raymart Basilan, 20, pulos mga residente sa maong barangay human ang duha nakaangkon og grabeng kadaot sa ilang ulo ug kalawasan human sila nangalagpot samtang nabangil sa ilawom ang ilang motorsiklo.
Samtang gisikop sa kapolisan ang drayber sa delivery truck nga si Leonardo Cerna, 57, sa Tanjay, Negros Oriental. Ang duha nagsunod padung sa direksyon sa Cebu City.
Matud pa ni PO1 Jason Panilag, imbestigador sa Naga City Police Station nga tungod giayo pa man ang karsada sa pikas nga lane, usa lang ka lane ang gigamit sa mga mopadung sa habagatan ug amihanan.
Sumala pa nga dunay trabahante nga nagdala og signal flag nga maoy mosenyas sa mga sakyanan aron magpuli-puli og agi sa usa ka lane. Niadtong tungora ang Corominas bus liner (GVL 856) nga gimaneho ni Nestor Patino, 52, nga taga Minglanilla nga padung sa Barangay Don Andres Soriano sa Toledo City gisenyasan sa flag man nga moabante.
“Usa ra man ka-lane ang gigamit nila kay gi-ayo man ang pikas dalan unya ni-go signal ang flag man nga makasulod na ang bus,†matud pang Panilag. Diha-diha gisenyasan usab sa flag man ang mga biktima nga nag-una sa delivery truck aron sa paghunong. Apan giingong tungod kay dulhogon ang karsada milahos ang trak ug gidasmagan ang bus ug ang motorsiklo sa mga biktima.
Matud pa nga nakamenor pa og gamay ang trak apan giingong nabugto ang brakes niini ug naigo ang bus ug dayon ang motorsiklo nga nabangil sa ilawom ug naguroy og napulo ka metros.
Sumala pa nga si Peñarejo daling gidala sa Minglanilla District Hospital samtang si Basilan gidala sa South General Hospital apan pareho silang gideklarar nga patay na. (BANAT NEWS)
- Latest
