CEBU, Philippines - Gikanselar sa City Council for the Protection of Children (MCCPC) ang “Horror Booth†karong tuiga alang unta sa lima ka adlaw nga Halloween sa kabataan.
Gitakda unta kining sugdan unta sa Oktubre 30 niining tuiga sumala sa na-schedule na daan.
Si Sarah Walker-Cortes nga maoy chairperson sa MCCPC mipahibalo ug mipasabot nga ang hinungdan sa ilang pagkanselar sa maong kalingawan mao ang kasiguroan sa mga tawo nga mosulod sa matag booth niini.
Si Sarah Cortes nga asawa ni Mayor Jonas Cortes miingon nga nagpadayon pa gihapon ang mga aftershock ug kuyaw kaayo nga may stampede sa mga mosaksi sa mga kalingawan sa Horror Booth.
Ayuhonon pa usab sa kagamhanan ang Mandaue City Sports and Cultural Complex sa sitio Tribunal sa barangay Centro isip venue unta sa Horror Booth.
Ang Horror Booth sa dakbayan nga nagsilbing kalingawan sa kabataan sa pagsaulog sa Adlaw sa mga Kalag sa matag tuig kanunay nga gipaluyohan sa Kaabag Foundation Inc.
Hinuon si Cortes mitataw nga may horror booth man o wala karong tuiga, sa gihapon ang 650 ka indigent nga mga bata gikan sa 27 ka barangay sa gihapon ilang lingawon sa paghatag og mga dulaan ug mga pagkaon .
Ila kining gitakda nga himoon sa Disyembre 20 niining tuiga.
Si Maricel Yu nga maoy focal person sa kagamhanan alang sa MCCPC sa sayo pa miingon nga mokabat sa P396,000 ang gigahin sa kagamhanan alang sa pagkaon sa kabus nga kabataan ug hatagan usab sila og t-shirts sa i-kids summit niining tuiga. (BANAT NEWS)