Sa Bohol 3 pa ka lungsod way kuryente

CEBU, Philippines - Gikonpirmar  ni Department of Interior and Local Government (DILG) Secretary Mar Roxas nga mibalik na sa normal ang   suplay sa kuryente sa mga  lungsod sa Bohol human sa  7.2 magnitude nga linog nga nitay-og sa lalawigan niadtong Oktubre 15.

Matud pa ni Roxas, tulo na lamang ka lungsod sa pagkakaron ang wala pa gihapo’y suplay sa kuryente nga mao ang Maribojoc, Loon ug Sagbayan.

Dugang pa sa kalihim, ang police station ug munisipyo lamang sa lungsod sa Loon ang adunay suplay sa kuryente karon. Giingong gihimoan na kini og paagi sa Department of Energy (DOE) ug lokal nga electric cooperative nga mahibalik na sa normal ang suplay sa kuryente sa tibuok lalawigan.

Samtang gipahibalo ni Director Asteria Caberte sa Department of Trade and Industry (DTI) sa Rehiyon 7 nga susihon na sa DOE ang giingong over pricing sa pagbaligya og gasolina sa lalawigan sa Bohol  human  sa linog.

Matud pa ni Caberte, dili apil sa price freeze ang gasolina ug wala nay kakulang sa suplay sa lalawigan apan nadugay lamang ang pag-abot tungod sa mga gubang dalan.

Una nang mipagawas og price freeze ang DTI sa mga nag-unang palaliton sa Bohol ug Cebu apan wala naapil niini ang presyo sa gasolina.

Sayo niini, gireklamo sa pipila ka mga residente sa probinsya sa Bohol ang P100 matag litro nga presyo sa gasolina tungod kay nagdugang lamang kini sa kalisod sa mga motorista.

Gireklamo usab sa ubang tricycle driver sa maong probinsya ang giingong pag-limiti sa pagbaligya og gasolina sa ubang gasoline station og usa  ka litro lamang sa matag sakyanan nga magpagasolina. (BANAT NEWS)