CEBU, Philippines - Dul-an usa ka bilyon ka pesos na ang kadaot nga gibilin sa 7.2 magnitude nga linog sa Sugbo ug Bohol samtang nagpadayon pa gihapon ang mga aftershocks. Matud pa sa National Disaster Risk Reduction and Management Council nga kapin sa 759 milyones pesos na ang kadaot nga naangkon sa mga infrastructures sa tibuok rehiyon nunot sa linog nga nahitabo.
Samtang 185 na ka tawo ang nakalas, 583 ang angol ug siyam pa ang missing. Apektado usab ang kapin sa 700 mil ka pamilya o tulo ka milyon ka mga tawo ang naapektahan sa maong linog. Kagahapon sa buntag, mitala na ang Philippine Institute of Volcanology and Seismology og kapin sa dos mil ka mga aftershocks ug 37 ra niini ang nabatyagan sa Sugbo ug Bohol sukad sa pag-igo sa linog niadtong Oktubre 15.
Lakip sa nabatyagan mao ang aftershocks kagahapon sa alas 4:40 sa kaadlawon nga mitala og magnitude 5.1 sumala pa sa website sa Phivolcs.
Sunod nga nabatyagan mao ang magnitude 5 nga nitay-og sa alas 9:45 sa buntag ug ang magnitude 4.8 sa alas 4:05 sa hapon. Matud ni Phivolcs supervising science specialist Jeffrey Perez ang mga pagtay-og mga linog gihapon kini apan gikonsiderar lang nila nga aftershocks tungod kay pulos kini naggikan gihapon sa East Faultline sa Bohol.
Si Joy Tumulak sa Cebu City Traffic Operations and Management miingon nga gi-recall na ang mga off-duty nga mga empleyado niini aron sa pag-monitor sa epekto sa linog. (BANAT NEWS)