CEBU, Philippines - Sobra sa 200 ka mga pamilyang naapektahan sa linog sa barangay San Roque ug Tanke, dakbayan sa Talisay ang nakadawat og mga hinabang gikan kang Senador Alan Peter Cayetano kagahapon sa hapon.
Si Cayetano kinsa uban sa iyang asawang si Taguig Mayor Lani Cayetano gikuyogan nila ni Kongresista Gerald Anthony “Samsam†Gullas Jr. sa unang distrito sa probinsiya ug sa apohan niining si kanhi kongresista Eduardo Gullas sa pag-apud-apod sa mga hinabang.
Si Samsam nga nahinabi sa Banat News kagahapon mibutyag nga 80 ka pamilya sa barangay San Roque ug 149 ka pamilya sa barangay Tanke kansang mga balay nangaguba sa linog. Gibutyag ni Samsam nga mga bugas ug delata ang gipanghatag ni Cayetano ngadto sa mga biktima. Matud usab ni Samsam nga niining semanaha gikatakda ang iyang pagpanghatag og mga hinabang ngadto sa tanang mga naapektohan sa linog sa mga kabarangayan sa Talisay.
Gikan sa probinsiya sa Bohol si Cayetano naabot sa dakbayan sa Talisay uban sa iyang asawa sakay sa chopper nga mitugpa diha sa hawanan sa Talisay City Central School sa barangay Poblacion. Si Cayetano misusi usab ngadto sa kabaybayonan sa Tanke pagsuta kung wala na bay oil spill tungod sa nalunod nga M/V Saint Thomas de Aquinas diha sa Lawis Ledge habig sa barangay Tanke.
Gikan sa barangay Tanke si Cayetano milahos kini ngadto sa Cebu City Medical Center diin gisusi niya ang kahimtang sa maong tambalanan. (BANAT NEWS)