CEBU, Philippines - Miabot na ang mga water purifiers nga gidala sa Armed Forces of the Philippines pinaagi sa Central Command sa lungsod sa Loon ug Sagbayan, Bohol aron sa pagtabang sa problema sa tubig sa maong mga lugar.
Gikalipay kini og dako sa mga opisyal sa lungsod sa Loon nga naglakip kang Loon Vice Mayor Elvie Peter Relampagos.
Matud pa ni Relampagos nga ang pagbutang og water purifier dako kaayo nga tabang sa mga biktima sa linog sa iyang lungsod tungod nagkinahanglan sila karon og limpyo nga tubig.
Nabalik na bag-ohay lang ang water supply sa lungsod sukad niigo ang linog apan wala pay abli nga water purifier store sa lungsod tungod kay wala pa mabalik ang supply sa kuryente sa lungsod.
“Any help that will come in our town will be more than appreciated as long as it comes from kind hearted people,†matud pang Vice Mayor Relampagos sa gipadalang pamahayag dinhi sa Banat News sa Civil Relations Group sa Central Command.
Si Vice Mayor Relampagos nipahigayon temporaryo sa iya session sa Konseho gawas sa munisipyo tungod kay dili pa luwas ang ilang buhatan human niigo ang linog. Gatusan na ka mga evacuees ang nakapahimulos sa water purifier system aron mo-avail sa free purified water.
Usa na si Esmael Yaya, residente gikan sa Motosur, Loon nga nagpasalamat sa pagbutang sa water purifier system tungod lagi kay wala sila maanad sa pag-inom sa tubig sa gripo.
Laing water purifier system ang gibutang sa lungsod sa Sagbayan nga susama ang katuyoan aron paghatag og luwas imnon nga tubig.
Sumala pa nga ang maong mga water purifier system makalimpyo og 32 mil ka litrong hugaw nga tubig aron luwas kining mainom. (BANAT NEWS)