Unang adlaw filing sa COC malinawon

CEBU, Philippines - Nahugyaw ang mga nagkadaiyang buhatan sa Commission on Elections sa Sugbu kagahapon sa unang adlaw sa pagsang-at sa ilang mga certificates of candidacies (COCs).

Dunay mga nanggungis na sa politika ug duna say mga newcomers nga misuway og taak niining bugnong lugaynon. Dunay mga nag-solo sa pag-file samtang duna say gikuyogan sa ilang mga supporters.

Sa Mandaue City, 30 ka mga nangambisyon og posisyon sa barangay ang mi-file sa ilang mga kandidatora. Dunay gusto nga magkapitan samtang duna say gustong magpapiling kagawad.

Samtang 84 ka mga kandidato usab ang miduso na sa ilang certificate of candidacy (COC)  kagahapon diha sa buhatan sa Comelec sa siyudad sa Talisay.

Si Anna-Lou Bacho, Comelec assistant officer mibutyag nga ang maong gidaghanon sukad kini nianang pagkabuntag hangtud sa mga ala 1:37 sa hapon kagahapon.

Walo niini ang mikandidato sa pagka-kapitan sa ilang mga barangay ug 76 ang pagka-kagawad, sila naggikan sa 12 ka mga barangay nga gilangkuban sa Cansojong, Jaclupan, Lagtang, Lawaan I, Lawaan II, Dumlog, Maghaway, Manipis, Poblacion, San Roque, Tapul ug Tanke. Ang dakbayan sa Talisay gilangkuban kini sa 22 ka mga barangay.

Ang kanhi seaman nga si Ricardo Adlawan, 80 anyos, naglukdo sa iyang bag ug nagsungkod nga miadto sa Comelec ug mi-file sa iyang COC, apan ang rason dili tungod kay gusto siyang makaserbisyo sa iyang kabarangay kondili aron duna siya’y trabaho. Matud niya gipunayan siya og yawyaw sa iyang kapikas tungod kay wa siya’y trabaho.

Samtang ang chief of staff ni  Cebu City Mayor Michael Rama nga si Philip Zafra, kinsa midagan sa pagka barangay kapitan sa Tisa gihulagway nga engrande ang pag-abot tungod kay duna kini motorkada sa  pag-file sa iyang kandidatora.

Miabot og 152 ka mga kandidato sa pagka-barangay kapitan ug  kagawad ang natala pagka-alas 3:30 kagahapon sa Cebu City Comelec. Ang 69 gikan sa south district samtang 83 sa north district. Samtang ang Provincial Comelec nakatala og 1,815 ka mga kandidato sa pagka-kagawad ug 209 usab sa pagka-kapitan.

Matud pa nga 26 pa lang ka mga siyudad ug lungsod sa Cebu Province ang nakasumitir sa ilang report atol ning pagsulat sa balita.

Hinuon si Atty. Lionell Marco Castillano nagkanayon nga naanad na silang gamay ra gyud ang mo-file og COCs sa unang adlaw. Apan iyang giawhag ang mga kandidato nga dili maglangay kay kutob lang sa Oktubre 18 ang filing niini. (BANATNEWS)