CEBU, Philippines - Dili mangayo og pasaylo ang Pilipinas o si Presidente Benigno Aquino III sa nahitabong hostage crisis niadtong 2010 nga miresulta sa kamatayon sa walo ka mga turistang taga Hong Kong.
Si Aquino mihatag og kahigayonan nga atubangon si Hong Kong Chief Executive C.Y. Leung nga mihangyong makigkita kaniya samtang didto pa siya sa Bali, Indonesia alang sa Asia-Pacific Economic Cooperation forum.
Atol sa ilang meeting sud sa 30-minutos, mipadayag si Aquino sa iyang kinasing-kasing nga pahasubo sa maong trahedya apan miklaro nga dili siya mangayo og pasaylo tungod sa usa lang ka kasaypanan sa usa ka tawo.
Si Aquino mibutyag sa mga tigbalita nga gipasabot siya ni Leung nga sa ilang kultura, mangayo gyud sila og pasaylo sa mga panghitabo bisan dili direktang nalambigit ang gobiyerno. Apan giklaro dayon ni Aquino kang Leung nga sa kultura sa mga Filipino, mangayo lang kini og pasaylo kung kita maoy sad-an, ang atong nasud, ang atong gobiyerno o ang tibuok Pilipinhon.
"So sabi ko, that’s your culture. You practice those, that’s your system. But in our system iyong… we cannot admit wrongdoing if it’s not ours... From our perspective, there is one lone gunman responsible for this tragedy," pasabot pang Aquino.
Hinuon matud pang Aquino, si Leung mitahod sa kultura sa mga Filipino.
Kahinumdoman nga walo ka Hong Kong tourists ang nakalas dihang gi-hostage sa usa ka gitaktak nga polis ang tourist bus aron siya mabalik sa trabaho apan napalpak ang rescue operation.
Niadtong milabay’ng adlaw, siyam ka reporters sa Hong Kong ang gi-ban sa Indonesian officials tungod sa pagbastos kang Aquino kabahin sa isyu sa maong hostage crisis. (BANAT NEWS)