CEBU, Philippines - Naglaraw ang kagamhanan sa syudad sa Talisay nga patas-an ang gihabugon sa sea wall sa baybayon niini aron dili makasulod ang mga dagkong bawod sa dagat kun adunay bagyo nga moigo dinhi sa Sugbo. Si Talisay City Councilor Danilo "Danny" Caballero miingon nga mao kini ang bugtong solusyon sa suliran bahin sa dagkong bawod nga mohapak sa mga kabalayan sa maong dakbayan.
Namugna kining maong laraw human masugamak sa mga higanteng bawod ang tulo ka mga barangay daplin sa dagat sa maong syudad sa miaging adlaw.
Gumikan sa maong kasinatian, si Caballero pormal nga miduso og resolusyon atol sa ilang sesyon sa konseho kagahapon. Nasuta nga mikabat sa dul-an sa 300 ka pamilya ang apektado sa paghapak sa dagkong bawod sa mga barangay Dumlog, Cansojong ug Poblacion.
Sigun sa report sa Talisay City Disaster Risk Reduction, nga ang barangay Poblacion maoy nagrabehan diin 170 ka pamilya nga naapektohan, gisundan sa barangay Dumlog nga adunay 95, ug ang barangay Cansojong 32.
Ang maong report nagkanayon usab nga adunay 10 ka mga panimalay ang hingpit nga nangaguba.
Nasayran nga miabut og 1.6 metros ang gitas-on sa matag bawod nga mihapak sa kabalayan sa nahisguang mga barangay hinungdan nga nabungkag gyud ang 10 niini.
Si Mayor Johny delos Reyes ug Konsehal Danilo "Danny" Caballero nibisita sa maong mga pamilya ug mihatag og relief goods ngadto sa nahisgutang mga residente nga namakwit sa Talisay City gym. (Chester Abadilla/WC)
Tabang sa DSWD sa PWDs gihandom
Ang kasaulogan sa ika-39 ka tuig sa Department of Social Welfare and Development sa Central Visayas (DSWD-7) alang sa Area Vocational Rehabilitation Center (AVRC II) niini gipunting sa pagpadasig sa tanang mga tawo nga may apan sa panglawas.
Sumala pa ni Kerwin Macopia, usa sa mga tigpamaba sa DSWD-7 nga ang AVRC II matinabangon kaayo ngadto sa mga Persons with Disability (PWD) pinaagi sa pagtanyag og mga nagkalain-laing programa alang sa pagpausbaw sa ilang kapasidad lakip na ang pagdasig kanila nga mamahimong aktibo sa komunidad.
Matud pa usab ni DSWD-7 Regional Director Mercedita Jabagat nga sa sulod sa 39 ka tuig, ang AVRC II nakatabang na sa kaliboan ka mga PWDs nga buta, bungol ug amang pinaagi sa pagtanyag kanila og kahigayunan sa panarbaho.
Gipadayag ni Jabagat nga iyang gidasig ang mga magpapatigayon ug uban pang anaa sa komunidad nga mohatag og higayon sa mga PWDs nga makapamatuod sa ilang kaugalingon nga makamao sila motrabaho sama sa mga normal nga tawo.
Samtang si Macopia nagkanayon usab nga isip usa ka non-residential nga institusyon, ang AVRC II nagtanyag og nagkadaiyang kurso sama sa Therapeutic Massage, Electronic Motor Repair, Computer Electronics, Basic Sewing, Furniture and Cabinet Making, Commercial Cooking ug Cosmetology.
Gitug-an ni Macopia nga ning bag-ohay lang adunay duha ka batch nga magtutungha sa AVRC II nga malampusong nakapasar sa massage therapy licensure examination. Ang eksamin gipahigayon didto sa Department of Health sa rehiyon (DOH) diin si Olymer Adiva nga usa ka buta, 24, nakasulod sa rank 3 sa maong eksaminasyon sa tibook nasud.
“The success of our clients is also the success of AVRC and to the rest of the DSWD family,†kini butyag pa usab ni Jabagat. (BANAT NEWS)