CEBU, Philippines - Gikonbikto sa korte ang usa ka manager sa bangko sa kasong qualified thief nga giatubang niini.
Ang gikonbikto ni RTC-7 Branch 23 Judge Eric Menchavez sa kasong qualified thief mao si Emilio Yrenaya Jr., kanhi manager sa usa sa bangko nga nagbase dinhi sa Sugbo.
Ang desisyon ni Judge Menchavez gibasa atubangan sa abogado ni Yrenaya kinsa nitugot nga dunggon ang maong kaso pinaagi sa trial de absentia tungod kay ang maong akusado nabilanggo usab didto sa Iloilo City Jail human kini makonbikto sa laing kaso.
Gibasa sa korte ang silot sa maong konbiktado apan sigun sa revised rules of court dili unya mahimo nga isibya o kaha ipublikar ang silot hangtud nga dili mabasa personal ang maong desisyon nga gidungog pinaagi sa trial de absentia.
Apan base sa Revised Penal Code ang kasong qualified thief adunay silot nga gibanabana nga gikan sa 8 ngadto sa 10 ka tuig nga pagkabilanggo.
Gimando hinuon sa huwes ang dinalian nga paghatud sa orihinal nga kopya sa maong desisyon sa korte ngadto sa bilanggoan sa Iloilo City aron hingpit nga mabasa sa konbiktado.
Nasayran nga ang konbiktado napakyas sa pag-liquidate sa kwarta nga giintrigo sa management sa bangko hinungdan nga gipasakaan kini sa nahisgutang kaso. (BANAT NEWS)