CEBU, Philippines - Bisan og wala’y nadawat nga report kabahin sa narco-politics ang officer-in-charge sa Talisay City Police Station miawhag sa publiko nga mosumbong ngadto sa iyang buhatan kung ugaling dunay nasayran kabahin sa mga politiko kinsa giingong gipaluyohan og mga drug personality.
Si Superintendent Resty Santos miklaro nga wala sila’y nadawat nga report nga dunay mga politiko sa Talisay nga migamit og drug money sa ilang pagpangampaniya sa umaabot nga elekisyon sa barangay karong Oktubre 28, 2013.
“So far, wala kita’y nadawat nga report about narco-politics sa atong siyudad,†ni Santos pa.
Ang narco-politics buot pasabot niini nga usa ka politiko migamit sa drug money sa iyang pagpangampaniya sa elekisyon o gipaluyohan og drug personality.
Ang OIC nanawagan sa publiko nga mosumbong ngadto sa iyang buhatan o ba kaha mosekreto og hatag og impormasyon ngadto kaniya kung dunay mahibaw-an kabahin sa narco-politics. Nunot niini si Santos nagkanayon nga nangandam na sila alang sa umaabot nga eleksiyon sa barangay.
Dugang ni Santos nga bisan og wala’y mga na-report nga mga insidente sa Talisay sukad pa kaniadto nga naglambigit sa eleksiyon gikonsidera gihapon niya ang 22 ka barangay sa siyudad isip mga hot spot o buot pasabot nga wala’y kompiyansa ang kapolisan sa pagmentenar sa kahusay ug kalinaw.
“We treat every election as hot spot. The 22 barangays kay init man gyud basta barangay election, hinungdan nga dili gyud ta relax niini,†ni Santos pa. (BANAT NEWS)