Polis nga mitabang sa rescue operations sa Bayawan nalumos
CEBU, Philippines - Usa ka sakop sa PNP Scout sa Regional Public Safety Battalion ang patay human kini maanod sa kusog nga baha sa Bayawan City, Negros Oriental adtong miaging adlaw atol sa search and rescue operation tungod sa wala’y puas nga pag-uwan sulod sa 12 ka oras dala sa habagat.
Si PO1 Rodelin Gonzaga, 29, nga taga Bayawan City, patay nang nakaplagan human milutaw iyang lawas sa Barangay Caranoche, Sta. Catalina kagahapon sa sayo sa buntag.
Matud ni Supt. Renato Dugan, Public Community Relations sa PRO-7, nga 72 ka mga scouts ang gi-deploy sa Negros Oriental human sobra sa 5,000 ka pamilya ang apektado sa pagbaha mga alas 9:00 sa buntag kagahapon.
Matud pa nga si Gonzaga usa ka “strong swimmer†apan wala kini makapiog sa kakusog sa bul-og sa tubig. Gisuwayan siya sa pagluwas sa iyang mga kauban apan wala kini magmalampuson.
“Nag-abot ang tubig dagat ug ang flood nga kusog ang current mga waist level lang unya paghapak na he no longer recovered,†matud ni Dugan.
Si Randy Salvero, 37, maoy nakadiskubre sa lawas ni Gonzaga ug maoy mipahibalo kang Caranoche barangay captain, Alfonso Ulam.
Daling gidala ang lawas sa Bayawan District Hospital apan gideklarar kini nga dead on arrival.
Si Dugan midugang nga ang combat operation sama sa search and rescue kalabot kini sa Special Insurgency Operation Scout Training sa PNP. Motapos unta ang maong training sa sunod semana.
Si Dugan mipasabot nga ang kapulisan kinahanglang magbinantayon isip frontliners sa pagluwas og kinabuhi.
“We cannot save their (people) lives if we cannot save ours kay og ang kinaiyahan ang makontra walay maayong laki,†matud niya. Si Gonzaga adto lang Enero 2012 nasulod sa PNP.(/EIM) (BANAT NEWS)
- Latest
