CEBU, Philippines - Gibansay sa kapolisan sa dakbayan sa Talisay ang mga membro sa Barangay Intelligence Network (BIN) bahin sa paghatag og mga intelligence report.
Si Senior Inspector Al Pascual , deputy chief sa Talisay City Police Station (TCPS) mibutyag sa Banat News kagahapon nga 40 ka mga bag-ong recruit nga BIN ang gipaubos sa seminar ug orientation niadtong Biyernes kabahin sa intelligence report.
Ang nag-seminar sa mga BIN mao ang hepe sa Provincial Intelligence Branch (PIB) nga si Superintendent Rodolfo Albotra.
Gibutyag ni Pascual nga sa maong seminar gitudloan ang membro sa BIN bahin sa intelligence cycle diin usa niini mao ang paghipos og mga impormasyon nga ma-report nila ngadto sa kapolisan.
Gipasabot ni Pascual nga ang BIN dili unta kini angayan sa reactive nga gimbuhaton sama sa pagkuyog ngadto sa mga polis kung adunay ipahigayong checkpoint sa kadalanan. Apan kung ang kapolisan makuwang sa personnel mapugos kini og dala sa force multiplier o mga BIN.
Ang BIN boluntaryo sa ilang serbisyo isip mga force multiplier sa kapolisan.
Ang ubang mga BIN, mga tanod sa kabarangayan , samtang ang uban mga pribadong indibidwal nga buot lang moserbisyo sa komunidad nga walay sweldo.
Dugang ni Pascual nga padayon pa ang ilang pagpanawat og mga BIN apan higpit nilang susihon ang mga background sa mo-aplay pagsiguro nga walay mga badlongon nga makasulod. (BANAT NEWS)