CEBU, Philippines - Ang mga magpapatigayon dinhi sa Sugbo nakapanglantaw nga makahatag og epekto sa ekonomiya kun hingpit na nga mawagtang ang Cebu Investment Promotions Center (CIPC).
Matud ni Philip N. Tan, presidente sa Mandaue Chamber of Commerce and Industry (MCCI), nga susama sila og baruganan og sa ubang mga magpapatigayon dinhi sa dakbayan sa Sugbo.
Bisan og si Tan miangkon nga suod niya nga higala si Mayor Michael Rama apan matud ni Tan nga husto ang pamahayag ni kanhi kongresista Tomas Osmeña nga ang trabaho sa CIPC dili kay pagbaligya ra sa South Road Properties (SRP).
Gipasabot ni Tan nga ang CIPC mihimo og mga promotions sa tibuok Sugbo ngadto sa mga magpapatigayon sa lainlaing kanasuran ug dili ra kay ang pagbaligya sa SRP.
Ang kagamhanan sa dakbayan sa Sugbo pinaagi sa City Council miuyon nga gahinan og P5.4 milyones ang CIPC karong tuiga isip cash assistance apan wala kini ipa-release ni Mayor Rama.
Ang wala pag-release sa maong salapi gitoohan nga maoy rason nga lima ka direktors sa CIPC nga gipangulohan ni Geronimo Sta. Ana nagdungan sa pag-resign sa ilang katungdanan.
Si Mayor Rama misalig na ngadto sa gitukod niya nga SRP Management Office nga maoy gitahasan sa pagdumala ug sa pagbaligya sa kayutaan sa SRP ngadto sa mga investors. (BANAT NEWS)