CEBU, Philippines - Usa ka suspetsadong tulisan ug gun for hire ang nasikop sa kapolisan sa dakbayan sa Talisay niadtong milabay’ng adlaw diha sa ilang balay sa barangay Lawaan III.
Ang suspetsado giila nga si Maldwin Cabusas, nag-atubang sa kasong murder diha sa sala ni Regional Trial Court (RTC) Judge Gilber Moises sa Branch 18.
Si Supt. Resty Santos, officer-in-charge sa Talisay City Police Station sa pakighinabi niini sa mga tigbalita mibutyag nga si Cabusas giingong usa sa duha ka kauban ni Joshua Tabera.
Kahinumduman nga si Tabera nasikop sa mga polis sa milabay’ng buwan diha sa barangay Lawaan III.
Matud ni Santos nga ang nahisgutang mga suspetsado giingong gawas nga mga gun for hire nalambigit usab sa mga insidente sa pagpanulis sa Talisay ug ngadto sa silingang mga dakbayan ug kalungsoran. Usa sa ilang mga kauban ang padayon karong gipangita sa mga polis.
Gibutyag ni Santos nga si PO1 Euwen Pitogo nga ig-agaw ni Cabusas maoy iyang gitahasan sa paghangyo sa suspetsado sa pag-surrender ngadto sa kapolisan.
Si Cabusas duna kini kasong murder kaniadto apan niadtong buwan sa Pebrero niining tuiga gi-probationary dismissed sa korte tungod kay ang mga paryente sa biktima wala na motungha sa hearing sa kaso.
Gibutyag usab ni Santos nga ang grupo sa nahisgutang mga suspetsado maoy suspetsado sa pagpusil patay kaniadto sa pag-umangkon ni Senior Superintendent Audie Villacin ug nag-atubang kini karon og kasong murder.
Gawas niini ang mga suspetsado napasakaan usab kini og kasong frustrated murder tungod sa pagpusil nila sa Korean national nga giingong ilang gitulis diin lakip sa naangol sa maong hitabo ang drayber sa traysikol sayo niining tuiga. (/EIM) (BANAT NEWS)