CEBU, Philippines - Ang kanhi regional director sa National Bureau of Investigation kon NBI sa Central Visayas nga si Assistant Director Medardo Delimos mao na karon ang bag-ong pangulo sa NBI national office.
Si Justice Sec. Liela Delima nitudlo kang Delimos isip Officer-in-Charge (OIC) sa NBI national office.
Si Delima niingon nga si Delimos magpabilin sa iyang katungdanan samtang wala pay matudlo ang Department of Justice nga mahimong NBI director hulip sa ni-resign nga si director Nonnatus Caesar R. Rojas.
Nasayran nga si Rojas niduso sa iyang resignation ngadto ni Presidente Noynoy Aquino human nitumaw ang kontrobersiya nga ang mga NBI agents nagdawatan og salapi aron lamang dili madakop si pork barrel scam queen Janet Lim Napoles.
Si Aquino nisulay unta sa paghangyo ni Rojas nga magpabilin apan sa Rojas wala na magpapugong sa iyang hingpit nga pagbiya sa NBI.
Si Delima nagkanayon nga si Delimos maoy gitahasan sa administrasyon sa matag adlaw nga operasyon sa NBI national office ubos sa kamanduan sa iyang buhatan. (/WC) (BANAT NEWS)