CEBU, Philippines - Gipasakaan kagahapon og kasong kriminal ang usa ka negosyanteng Chinese tungod sa pagpamaligya og peke nga Viagra nga orihinal nga hinimo sa Pfizer.
Niadtong Martes, ang National Bureau of Investigation (NBI)-7 pinangulohan ni Atty. Renan Oliva mipatuman sa search warrant batok sa tag-iya sa Golden Ling Merchandising diha sa dalan Colon nga miresulta sa pagkasikop sa Chinese national nga si Ali Tang alias Alibaba.
Matud pa ni Oliva sa Banat News wala mo-waive si Tang ug mipadayag nga iyang atubangon ang kaso ngadto sa korte.
Sa interbyu ni NBI Regional Director Antonio Pagatpat kang Tang giingong giangkon niini nga namaligya siya og Viagra. Giingong gikan kini sa Zamboanga ug posibling gikan sa China. Nakuha gikan sa tindahan ni Tang ang lain-laing klase nga Viagra sa 383 ka boxes nga giingong gikan sa Pfizer.
Apan niadtong Hulyo, ang Pfizer consultant nga si Maximo Ocampo misang-at og reklamo diha sa NBI hinungdan sa maong operasyon. Gani napalitan og sample sa peke nga Viagra ang maong tindahan niadtong Agosto 27, 2013.
Matud pang Pagatpat wala sila kaayo magpokus sa gipamaligya nga fake nga Viagra apan nabalaka sila sa panglawas sa mga nakapalit niini.
Ang kaso nga gipasaka batok kang Tang sa Cebu City Prosecutor’s Office mao ang violation of the Intellectual Property Code of the Philippines. (BANAT NEWS)