40 ka wa ilhing patay ilubong karon
CEBU, Philippines - Karong buntag ipahigayon ang dungan nga paglubong sa kapin sa 40 ka patay’ng lawas nga wala pa mailhi human maugkat gikan sa nalunod nga M/V St. Thomas Aquinas didto sa Lauis Ledge habig sa dakbayan sa Talisay.
Gitakda nga si Cebu Archbishop Jose Palma maoy mopahigayon sa misa sa dili pa itunod sa ilang tagsa-tagsa ka lubnganan sa Carreta cemetery ang mga patay’ng lawas.
Ang mga patay’ng lawas gihakut gikan sa morgue sa Cosmopolitan Funeral Homes sugod ala-1:00 kaganinang kaadlawon. Bisan og ang mga patay’ng lawas gisulod og mga lungon apan mapanimahoan gihapon ang lang-og nga baho sa maong mga nagkadugta na nga mga lawas.
Wala mailhi ang maong mga lawas sa kabanayan nga nagpangita pa sa mga missing nga pasahero tungod kay nadugta na ang kalawasan ug dili na maila pinaagi sa ilang panagway. Si Elbert “Bong†Ebo, manager sa Cosmopolitan Funeral Homes miingon nga ang maong mga lubnganan maayong himoong permanente na isip handumanan nga biktima sila sa pagkalunod sa barko sa 2Go Shipping. Ang 2Go Shipping maoy migasto sa pagpatukod og mga nitso nga kalubngan sa mga patay’ng lawas nga wala pa hiilhi.
Kun mailhan na ang maong mga patay’ng lawas ang ilang tagtungod makapili kun anha na ba lang ipadayon paglubong ang mga patay’ng lawas o dad-on sa ilang dapit. (BANAT NEWS)
- Latest
