CEBU, Philippines - Kadaghanan sa 142 ka pamilya kang kansang kabalayan anaa gitukod daplin sa Mahiga Creek nakadawat na sa ilang mga Notice of Violations ug nag-awhag kanila nga angay sila nga mopahawa dayon sa ilang nahimutangan.
Mao kini ang gibutyag ni Cebu City Legal Officer Jerone Castillo atol sa tigum sa mga sakop sa Reduce Danger Zone-Rivers (ReDZ-R) didto sa City Hall kagahapon.
Gibutyag ni Castillo nga ang 98 sa maong mga pamilya napadad-an na nila og Notice of Violations ug gihatagan sila og 15 ka adlaw sa pagpahawa na sa ilang gipuy-an nga daplin sa sapa.
Si Atty. Jose Daluz III, ang tsirman sa ReDZ-R, miingon nga ang mga hingtungdang pamilya mahimong makigtigum kanila sa City Hall aron makapadayag sila sa ilang sentimento.
Si Mayor Michael Rama miingon nga gusto gayud niya nga sundon ang gihimo sa Japan nga ang daplin sa ilang kasapaan hawan ug adunay karsada nga makaagi ang mga sakyanan.
Matud ni Rama nga gisud-ong niya ang kinatibuk-an sa Mahiga Creek diha sa Barangay Mabolo gikan sa ibabaw nga bahin sa Radisson Blu Hotel ug naaninaw niya nga gubot kaayo ang maong lugar.
Ang mga sakop sa ReDZ-R gusto nga himoon “pilot project†ang Mahiga creek nga limpyohan ang daplin sa sapa ug butangan usab og karsada sama didto sa Japan.
Apan nagpasabot kini nga daku kaayo ang kantidad nga gastoon sa dakbayan kay sigurado nga ang hingtungdang lumulopyo modangop na usab sa korte aron mapugngan ang demolisyon sa ilang kabalayan.
Matud hinoon ni Daluz nga dili g’yud dayon nila palayason sa ilang giistahan ang mga pamilya iniglapas sa 15 ka adlaw.
Dunay misugyot nga ang mga pamilya nga maapektahan unya sa clearing operation anha paestaha sa Block 27 sa North Reclamation Area, apan wala kaayo mosuporta niini si Mayor Michael Rama.
Matud ni Rama nga ang maong luna sa Block 27 mahal kaayo ang kantidad ug dili usab haum nga papuy-an kay residential area kining maong dapit. (BANAT NEWS)