CEBU, Philippines - Ang upat ka konsehal nga alyado ni Mayor Michael Rama misugyot nga usbon ang ordinansa nga nagpugong sa mayor nga makabaligya og kayutaan sa South Road Properties (SRP).
Sila si Konsehal Mary Ann delos Santos, Nendell Hanz Abella, James Cuenco ug Dave Tumulak misugyot nga angayan nga i-repeal na ang ordinansa. Matud sa upat ka konsehal nga alyado sa Team Rama nga bisan og dunay daghang kwarta ang dakbayan sa Sugbo apan kinahanglan gayud nga mobaligya kini og yuta sa SRP.
Ang upat ka alyado sa mayor miingon nga kinahanglan gayud nga mobaligya og yuta sa SRP ang dakbayan sa Sugbo aron magamit sa pagpatuman og mga proyekto.
Atol sa sesyon sa konseho sa dakbayan kagahapon, ang upat ka konsehal nga mga alyado ni Rama miduso sa ilang gisugyot nga resolusyon. Ang committee on Laws sa konseho sa dakbayan gitahasan nga mohimo og pagtuon sa gisugyot nga ordinansahon sa upat ka konsehal. Si Konsehal Sisinio Andales nga alyado sa Bando Osmeña Pundok-Kauswagan (BOPK) maoy gitahasan nga motimbang-timbang ug mopadangat sa iyang committee report sa sunod sesyon. (BANAT NEWS)