CEBU, Philippines - Human nga napasakaan og kaso ang usa ka ahensiya sa dakbayan sa Talisay kinsa giingong midawat og prenda sa kinawat nga mountain bike nabantayan nga mihinay na ang mga insidente sa kawat sa siyudad.
Si Superintendent Resty Santos, officer-in-charge sa Talisay City Police Station mibutyag sa Banat News nga sa milabay’ng mga semana usa ka nangangkong tag-iya og mountain bike ang mianha sa ilang buhatan ug mireklamo nga nakita niya ang iyang mountain bike sa usa ka pawnshop sa siyudad.
Nasuta nga giprenda kini sa usa ka tawo ug buot untang bawion sa tinuod nga tag-iya apan giingong wala giuli sa pawnshop tungod kay giingong lain ang nangangkong tag-iya niini nga miprenda ngadto kanila ug wala usab silay kalibutan kung ang maong butang kinawat ba kini. Matud ni Santos nga dihang mipasaka og kaso batok sa pawnshop ang maong tag-iya sa mountain bike gidawat kini ngadto sa piskaliya.
Ug sukad niadto naobserbahan niyang mihinay na ang mga insidente sa kawat sa Talisay.
Si Santos nagkanayon nga kung walay mopalit o modawat og mga kinawat nga butang posibleng mahunong usab ang mga insidente sa kawat.
Kahinumduman nga ang kinawatay sa metro sa tubig kuyanap usab kini sa Talisay ug gani base sa talaan sa kapolisan sa siyudad nga sa milabay’ng mga buwan sobra sa 100 ka mga biktima ang gikawatan og metrohan sa tubig.
Matag buwan kaniadto sobra sa 20 ka mga insidente sa kawat sa metro sa tubig ang ma-report, apan tungod pagbahad nilang ikiha ang mga junkshops nimenus usab ang mga insidente sa pagpangawat og metrohan.
Dugang ni Santos nga laing hinungdan sa pagkunhod sa insedente sa kawat sa siyudad mao ang pagkasikop sa mga suspetsadong kawatan ug tulisan. (BANAT NEWS)