CEBU, Philippines - Gihunong una ang pagsuyop sa nahabiling lana sa nalunod nga M/V Saint Thomas Aquinas gumikan wa pa nahuman ang pagbuslot sa mga tanke niini.
Kini maoy gipahibalo kagahapon sa command conference sa city hall ni Noel Kimmayong sa Malayan Towage. Sumala pa ni Kimmayong ang pag-drill sa mga tanke maoy preparatory process sa di pa ipahigayon ang siphoning karong Sabado.
Matud ni Kimmayong nga dunay lima gawas sa 11 ka tanke ang ilang na-drill sukad niadtong Septiyembre 9 ug nasuta nga ang duha ka tanke wa nay sud pa nga lana.
Dugang ni Kimmayong nga di pa usab sila maka-estimate pila na lang ang nahabilin nga lana sa tulo ka tanke nga human na nabuslotan.
Matud usab ni Kimmayong nga paningkamotan nila nga mahuman og buslot ang nahabiling unom ka tanke.
Kahinumduman nga ang MV Saint Thomas Aquinas nagdala og 120,000 litros nga lube oil, diesel ug fuel oil.
Samtang kagahapon gipakita usab sa tanang mitambong sa command conference ang duha ka hamubo nga video sa actual nga drillings. (/EIM) (BANAT NEWS)