Metro Aid gikan diskohan gi-pugakhang patay

CEBU, Philippines - Patay ang usa ka metro aid human kini gipusil sa wala mailhing tawo nga nagmotorsiklo pasado alas-7 sa miaging buntag diha sa Purok Candaguit sa barangay Tabla lungsod sa Liloan.

Ang biktima nailhan nga si Nickson Camanse, 28, usa ka stay-in worker sa Doros Corp. isip usa ka manilhigay.

 Si SPO3 Jason Gayo sa Liloan Police miingon nga sa wala pa mahitabo ang insidente   padung nang mopauli ang biktima gikan sa diskohan sa barangay Tabla Proper.

Matud pa nga dunay gikabingkil ang mga higala sa biktima sa grupo sa mga lalaking nailhan lang nga sila si Joseph Camay, Windel Saga ug Boy Tundag nga giingong molupyo sa maong dapit.

Apan nianang pagkabuntag samtang nagbaklay na pauli ang biktima kalit kini nga gihunongan sa duha ka lalaking nagmotorsiklo ug sa walay igong hinungdan midiretso pagpusil kaniya.

Ang biktima naigo sa iyang tiyan nga maoy naingnan sa iyang hinanaling kamatayon samtang ang mamumuno mipasirit usab palayo sa dapit.

Gidudahang improvised shotgun o pugakhang ang gigamit sa pagpamusil, samtang gisusi karon kung may koneksyon ang panagbingkil sa grupo sa biktima ug sa laing grupo diha sa diskohan nianang gabhiuna. (/EIM) (BANAT NEWS)