Sanga sa PhilsCA tukoron sa ika-4 nga distrito

CEBU, Philippines - Ang Philippine State College of Aeronautics  (PhilsCA) ug si  Cebu 4th District Congressman Benhur Salimbangon nagkahiusa sa  pagtukod  og sangang tunghaan sa PhilsCA  didto  sa ika-upat  nga  distrito.

Atol sa pagtak-op  sa kasaulogan   sa "Buwan ng Wika" nga giselebrar sa PhilsCA  sa Mactan Benito Ebuen Air Base Campus , si  Salimbangon mao  untay  pinasidunggang dinapit,  apan gumikan sa kontrobersiyal nga pork barrel issue ang iyang Chief of Staff nga si Elibrando Sinangote mao  na lay  mirepresentar   kaniya.

Matud pa ni Sinangote  nga  dako og tinguha si Cong. Salimbangon nga makapatukod  og sangang tunghaan ang PhilsCA   didto sa 4th District sa Sugbo.

Kini  alang sa mga tinun-an nga buot mokuha sa mga kursong maabot ra sa bulsa sa mga ginikanan.

Ang Cebu Technological University ( CTU) ug Cebu Normal University (CNU)   may   mga sangang tunghaan   na  sa   maong  distrito, sumala  ni Sinangote.

Dako og ikatabang ang PhilsCA kung matuman ang maong plano   kay si Cong. Salimbangon maoy mohatag og luna nga katukoran  niini.

Samtang si Dr. Bernard Ramirez ang Presidente sa PhilsCA sa pakighinabi sa Banat News mipadayag sa iyang tinguha nga makapalapad sa ilang tunghaan ngadto sa 4th District ug mao  kini  ilang  gitun-an  karon.

Si Dr. Nonadel Soriano ang PhisCA Campus Director sa iyang bahin masaligon  usab nga adunay mga hanas nga magtutudlo alang sa mga kurso nga ilang itanyag  sa ilang mga  sangang tunghaan.

Gumikan niini si Sinangote mapasalamaton sa PhilsCA kung mahinayon ang maong plano alang sa mga tinun-an nga dili maka-abot og bayad sa mga kurso nga  mahalon. (BANAT NEWS)