CEBU, Philippines - Personal nga gisusi ni PAF 2nd Air Division Commander Maj. Gen. Romeo Poquiz ug Lapulapu City Tourism Officer Hembler Mendoza ang palibot sa isla sa Mactan ug dakbayan sa Talisay aron makita kung daghan pa ang oil spill nga nahibilin sa mga apektadong dapit sa lalawigan sa Sugbu.
Luwan sa usa ka Huey helicopter gilibot ni Maj. Gen. Poquiz ug Mendoza ang isla sa Mactan ug dakbayan sa Talisay diin malunod ang M/V Saint Thomas Aquinas niadtong Agosto 16 sa gabii.
Nakita ni Maj. Gen. Poquiz nga naabot na sa baybayon sa dakbayan sa Talisay ang oil spill samtang gamay na lang ang nagpabilin sa palibot sa dakbayan sa Lapulapu.
Matud pa ni Mendoza bisan pa man niini ilang pahimangnoan ang tanang mga hotels, resorts ug beaches sa dakbayan sa Lapulapu nga dili una kuhaon ang mga temporary spill booms nga ilang gibutang aron dili makaduol sa baybayon ang lana.
Samtang gisugyot ni Poquiz ang dinaliang lakang pagkuha sa oil spill nga mikatap sa dakbayan sa Talisay aron dili kini makaapekto sa panginabuhian sa mga mananagat. (/EIM) (BANAT NEWS)