CEBU, Philippines - Ang mga portable gas stoves nahimo nang popular nga galamiton sa panimalay sa Central Visayas sumala sa Department of Energy 7(DOE-7). Gipadayag ni DOE-7 Regional Executive Director Antonio Labios nga sayon ra kaayo sa matag usa nga mogamit og butane camping stove tungod kay dali ra kini nga gamiton sa panahon kun adunay camping nga aktibidad.
Dugang pa ni Labios nga ang butane camping stoves gamitan og butane gas isip pangtubil nga may kapasidad nga 250 gram nga ibaligya sa mga tindahan. Gitug-an ni Labios nga ang butane camping stove dili makahatag og kadaot sa matag usa apan ang paggamit og butane canisters nga refillan sa LPG maoy makahatag og kadaot sa publiko.
Si Labios miingon nga ang ilang buhatan nakadawat na og mga taho nga ang butane canisters gigamit na isip refillanan og Liquified Petroleum Gas (LPG) ug nga kini gibaligya sa merkado.
Gisaysay ni Labios nga ang girefillan og LPG nga butane canisters kuyaw kaayo tungod kay mao na hinoon unya kini hinungdan nga mobuto tungod kay ang LPG dili susama sa butane. Gipasabot ni Labios nga ang butane canisters dili angay alang sa gas pressures sa LPG diin sa sirado nga containers, ang butane gas mohatag og pressure nga mas ubos pa kaysa LPG apan ang canisters gigama aron maoy mokontrolar sa minimum nga pressure.
Sumala pa ni Labios nga kasagaran ang mga butane canisters nga ibaligya sa tindahan imported gayud kini nga nagagikan sa Korea ug nga gigama ug gibaligya alang sa kausa lamang nga paggamit. (BANAT NEWS)