CEBU, Philippines - Gimando karon sa Maritime Industry Authority nga inspeksyonon ang tanang barko sa 2Go Shipping Lines ingon man sa Philippine Span Asian Carrier (PSAC) nga nalambigit sa trahedya diha sa Lawis Ledge sa barangay Tangke sa siyudad sa Talisay niadtong Biyernes sa gabii.
Ang aksidente mikalas og 32 ka mga kinabuhi, 172 ang na-missing ug 629 ang naluwas nga mga tripulante ug pasahero dihang nagbangga ang barkong MV St. Thomas de Aquinas ug MV Sulpicio Express 7 pasado alas-9 sa gabii.
Si MARINA-7 Legal Officer Jose Cabatingan sa interbyu sa Banat Manobela kagahapon miingon nga mipagawas og direktiba si MARINA Administrator Maximo Q Mejia, Jr. sa tanang regional MARINA offices nga inspeksyonon ang tanang barko nga gi-operate sa Philippine Span Asian Carrier (PSAC) (Sulpicio) Lines ug 2Go Shipping Lines aron pagsusi sa seaworthiness niini.
Matud pang Cabatingan ang ilang mga inspection team mitabang pa sa search and rescue operations kagahapon apan dunay inspeksyon nga himuon sa tanang mga barko sa maong duha ka kompanya dinhi.
Sumala pang Cabatingan ang mga inspectors sa Marina mahimong moisyu sa suspension sa mga barkong ilang makitang dunay mga depekto o nabutang sa peligro ang seaworthiness niini.
“Kung dunay findings nga may major deficiencies they can suspend immediately the said vessel,†matud pang Cabatingan. Kagahapon, ang MARINA mipagawas na og kamandoan nga nagsuspenso sa tanang mga barko sa maong duha ka shipping lines. Si Mejia miingon nga ang suspensyon sa mga barko gikinahanglan aron mainspeksyon .
Samtang dinhi sa Sugbu, si Cabatingan miingon nga ilaha pang susihon kung unsa nga mga barko ang naa karon dinhi sa maong mga kompanya..
“It was also decided that the immediate inspection be reinforced by a suspension order of all the ships belonging to the two companies and many of these ships are still out at sea but the directive is for these ships be immediately inspected as soon as they arrive in port,†matud pang Mejia sa report sa Philstar.com.
Gipaabot usab nga hulmahon karong adlawa o ba kaha ugmang adlawa sa Philippine Coast Guard ang special board of marine inquiry (SBMI) aron moimbestigar kung unsay nahitabo ug aron masuta kung kinsay sad-an ug kinsay angayang manubag, (BANAT NEWS)